يا سمح الوجاب

يا سمح الوجاب راك على طولت الغياب
ونا رايفت

يا سمح السهارى اغيابك راه حوسن افكارى
وحالى كان مانك بيه دارى حالة وطن دالنه اجداب
وراك انموج نشحت فى اقدارى كما عطشان يطرد فى سراب
ابقيت اتقول ذاهب فى صحارى لامركوب عندى لا شراب
وانت ظلمت ما بردت نارى ولاحاسيس دايرهن العاب
يا بوعين كعين البحارى حيه عليك قدامك احساب


يا سمح الحكاوى يابودور عالتق ثناوى
يامشكاى قربك كنت ناوى ليش امعاى تجرى عالخراب
وليش اتبعت شينين اللغاوى وليش اعداك دايرهم احباب
وقدرك ليش بين الناس شاوى وليش الصقر تحسابه اغراب
مانك شى يا خزرة الناوى الحى اتراب ويعاود اتراب

مانك فى سايل

مانك فى سايل وكان نكرت عندى لك دلايل
تلعب لعب

مانك لى غالى تلعب لعب ما تدرى بحالى
كنت عليك بانيهن امالــى بنيى طاح قيسه بنى مايـل
ولاننساك لاغيرك انغالى بين الناس مالك شى مثايـــــل


مانكش امعشوقى ننظر فيك واكلهن احقوقـــــى
لانك شوق جاير كيف شوقــــى لانك دمع كى دمعى السايـــــل
ولاتنشط من ضيقة اخلوقــــــى لانك حمل من يالاى شايــــل
وانت غلاك يجرى فى اعروقى وامفيت عذاب مانى شى طايل

لامانكش لى تلعب لعب ماحســـيت بــى
وانا الشوق داير بصر فى ريت النجم فى عز القوايـــــل
ونين انموت وانا لك وفى حكم غلاك ماهو قول قايــــــل
يابودور عالعاتق اســــفى راح الجوف من نارك دقايـــل

لا مانكش ريدى ننظر فيك تلعب يا اعبيـــــدى
وانت غلاك يسرى فى وريدى منه غير نزمط فى علايـــــــل
لاجافيت لانك جــاى فيدى روف على يا سمح المسايـــل
وين اتبان يبقى يـــــــوم عيدى وسط سماى تاق البدر هايـــل

مانك بى عابى تلعب لعب تحرق فى اعصابى
غبت عليك ما شطك اغيابى نرجى صفت مالمرجى الطايل
وانرضاك راضيبه عذابـى انريد ارضاك ديمة فيه عايـــل

ضاع الغلاء

ماعد عليه حسوفة امسامح عزيز وكل حد بظروفه
ضاع الغلا
ماعد انقول اخسارة انسيته وطفيت يا رفيقى ناره
وهى قبل ما كانت الا وهوارة بين الضلوع املهلبة فى جوفه
وركح وشاقى صاحبك بصغاره هذول هم اللى ديمة عليهم خوفه
من ضيم الزمان وبرمته وامراره ودنيا قديمة غير مى مكشوفه
مبنية على ساس الخيا غداره انظرها عليش امقمطة ملفوفة
عاش فى زمان امزاينة واتجاره لا يبيع لايشرى اقطع مصروفه
وتمه غريب ومى غريبة داره بين ناس تدعك كل حد بكتوفه
ايسمو السرقة كولسة وشطاره والطيب احذاهم قرعته ملهوفه
نين من عملهم ناقصات امطاره الوطن صاف لابدرى ولاصيوفه
ولا يفهموه انكان دار اشارة ولا اقدرو يقروهن صحيح احروفه
امعاهم برم شور اليسار مداره كى من اركب فى طايرة مخطوفة
وشيل احمول اثقال فوق اعباره شالهن وما فى لرض حط اكفوفه
حلف عالنظاف ايكمله مشواره لاجل الحى نهايته امعروفه
خذا درب قايد نيرات افكاره ما يسيبه لعند قطر الصوفه
دلال خاطرى غاشى اجواد عصاره اشراف اصل مافيهم ولاامعيوفه
وشيخم اجوادى ذايعات اخباره على كل راقد ريح عنده روفه
وامدقل ان صار ادعاك ما يذاره ايجى فوق سابق عالبلا امحدوفه
عليهم اتحوش الضان والخواره اللى بكل صيفه طيبة موصوفه
فى وطن زاهى منفلت نواره عقاير عفا من قبل مى مصدوفه
بعيد عالبحر والدوج والسمساره لاضى فيه ولا اطرق مرصوفه
وايدير بيت عشرينى وسيع مداره ايخيل فيه عبادى اطرح لضيوفه
قدامه اربط عاتى لذيذ مساره ايدير ليا زامن الحرب ادفوفه
وفيه بوجبين ابيض ايدير شراره ان تاق القمر يلاه ايسير اخسوفه
كلام منتهى ماعاد منه ماره ولا فالمنام انجاه نوم ايشوفه